கிளிவிடு தூது..

மரகத மலை மேலே 

மனமு மிக மகிழ்ந்து 

சிறகடித் திருப்பாயடி -கிளியே 

சிறிது (நீ) செவி சாயடி   1

நாயகன் என் கண்ணன் உற்ற 

நகர் மீது நீ பறந்தால் 

நேயமுடன் எடுத்தோதடி -கிளியே 

நெஞ்சம்  எடுத்தோதடி   2

 

முன்னரவன் சோலைதனில் 

முத்தம் ஒன்று வைத்த பின்னே 

சொன்ன சொல்லை மறந்தானடி -கிளியே 

சோர்வு மிகவாச்சடி   3

கோலமுடன் பவனி வந்து 

கைத்தலம் பிடிப்பேன் என்றான் 

காலமிக  வாச்சுதடி -கிளியே 

காத்திருக்க லாகாதடி  4

பேயுமெனைப் பிடித்ததென 

பந்தமெல்லாம் நினைத்து விட்டார் 

போயவனுக் குரைப்பாயடி -கிளியே 

போக்கிடம் எனக்கேதடி   5

சூனியந்தான் வைத்தார் என்று 

சோதரியும் நினைந்து விட்டாள் 

சூனியக் காரனடி -கிளியே 

சூதகமாய் பேசடி   6

திருமணம் செய்வதற்கே 

தந்தையவர் எத்தனித்தால் 

சிறுமனம் பொறுக்காதடி -கிளியே 

சிறியவள் நிலை சொல்லடி   7

கட்டிய உடுக்கையுடன் 

கண்ணனை தொடர்வதென்று 

கட்டுறுதி ஏற்றேனடி  -கிளியே 

கடிதினில் நீ செல்லடி  8

 தயிர்வழிப் பின்தொடர்ந்து 

திருடிக் களித்தவன் தான் 

உயிர்வலி அறிவானோடி -கிளியே 

 உண்மைநிலை சொல்லடி 9 

மாதரின் உடைகவர்ந்து 

மரமேறி அமர்ந்தவன்தான் 

காதலை உணர்வானோடி -கிளியே 

கண்கள் பனிக்குதடி 10

கள்ளனைப் போல் நாளும்நாளும் 

களவாடித் திரிந்தவன்தான் 

உள்ளநோய் அறிவானோடி -கிளியே 

உள்ளதை எடுத்தோதடி  11

 

பெற்றவர்கள் சிறையிருக்க 

பாடிக் களித்தவர்க்கு 

மற்றவர்கள் பொருட்டோ அடி-கிளியே 

மனமிக நோகுதடி  12

ராதையினை மறந்துவிட்டு 

ராப்பொழுதில் கிளம்புவோர்க்கு 

பேதையிவள் பொருட்டோ அடி -கிளியே 

பேச்சு(ம்) குளறுதடி!  13

தக்க தருணத்தில் வந்து 

தவறாமல் காப்பேன் என்றான் 

மிக்க துயர் ஆச்சுதடி -கிளியே 

மீள வழியென்னடி 14

சுகந்தரும் சோலைதன்னில் 

சொக்கித் திரிந்ததெல்லாம் 

பகல்கனவாச்சுதடி -கிளியே 

பேதையின் நிலைசொல்லடி  15

தோடியிலும் கமாசிலும் 

தொழுது காம்போதியிலும் 

பாடியதை மறந்தானடி -கிளியே 

பாவியின் நிலை சொல்லடி  16

உறக்கம் வருவதில்லை 

உண்ணவும் இயலவில்லை 

இரக்கம் இலையோ அடி -கிளியே 

ஏழையின் நிலை சொல்லடி  17

ஒப்பனையில் மனம் இல்லை 

உடையில் கவனம் இல்லை 

கற்பனையில் ஆடுதடி -கிளியே 

கண்டநிலை சொல்லடி  18

பித்தம் பிடித்ததென்று 

பேசிடுவர் தோழியர்தாம் 

நித்தமொரு  கதையாச்சடி -கிளியே 

நிறுத்த வழியென்னடி  19

தாமத(மு)ம் செய்தான் என்றால் 

தாங்காது இதயமென்று

ஆமவனுக் கெடுத்தோதடி -கிளியே 

அழவும் இயலாதடி  20

காதலியைத் தவிக்கவிட்டு 

குவலயம் புரப்பதுதான் 

மாதவனுக் கழகோ அடி -கிளியே 

மனமதை எடுத்தோதடி  21

பூணுகிற அணி களைந்து 

பண்டவன் செய்ததை சொல்ல 

நாண மிகவாகுதடி  -கிளியே 

நல்லபடி நீ கூறடி 22

 

காலம் அதிகம் இல்லை 

கடிதில் வருக வென்பாய் 

சீலம் இழந்தேனடி -கிளியே 

சீக்கிரம் நீ செல்லடி 23

எப்படி எடுத்துரைப்பேன் 

யாரிடம் எடுத்துரைப்பேன் 

செப்படி வித்தையடி -கிளியே 

செய்தவன் அவன்தானடி  24

முகத்தில் உறும் நகையும் 

முகுந்தன் அவன் மொழியும் 

அகத்தை வதைக்குதடி -கிளியே 

ஆவியும் வேகுதடி  25

 

சுழலில் இருத்தி விட்டான் 

சுகத்தைப் பறித்துவிட்டான்  

கழலில் விழுந்தேனடி -கிளியே 

கடிதில் வரச்சொல்லடி 26

தாமரைத் திருவிழியும் 

தேன்வடியும் உதடும் 

சாமத்தில் வாட்டுதடி -கிளியே 

சொல்லவியலாதடி 27

பாவையிவள் கண்ணீருக்கு 

பதில் உரைத்திடனும் என்றே 

கூவி நீ உரைப்பாயடி -கிளியே 

காதில் உரைப்பாயடி 28

கலவரம் ஆச்சுதடி 

கண்கள் மயங்குதடி -

நிலவரம் உரைப்பாயடி -கிளியே 

நெஞ்சம் உரைப்பாயடி 29

கண்ணன் என்னை எண்ணாவண்ணம் 

கன்னியர்கள் தடுத்தனரோ 

என்ன தெரியுமடி -கிளியே 

ஏழையும் ஆனேனடி  30

அய்யன் அவன் கண்ணயர்ந்து 

அமளியில் உறங்குகையில் 

பையநீ புகல்வாயடி -கிளியே 

பார்த்ததை சொல்வாயடி 31

பண்டொருநாள் பிரிந்துசென்ற 

பாவையின் றவனை  எண்ணி 

கொண்ட தவம் சொல்வாயடி -கிளியே 

கோலமும் சொல்வாயடி 32

எப்பொழுதவன் வருவான் 

எப்பொழுதருள் தருவான் 

முப்பொழுதும் தவித்தேனடி -கிளியே 

 மொத்தமும் சொல்வாயடி 33

இனிச்சொல்ல ஏதும் இல்லை  

இதயமும் தாளவில்லை 

கனிச்சொல்லில் நீ சொல்லடி -கிளியே 

கண்டதை எடுத்தோதடி  34

நீயும் சென்று திரும்பிடுவாய் 

நல்ல சேதி கொணர்திடுவாய் 

மாயவனின் நகர் செல்லடி -கிளியே 

மங்கையென் நிலை சொல்லடி 35